a r t o . a r t i a n

musika txikien katalogoa / catálogo de musicas mínimas

1. .

   BERRIA Xabier Martinek

   «Erraz azaldu ezin diren sentsazioez» betetako diskoa kaleratu du Borrokanek

   Izenburu luzea jarri dio Borrokan Berako rock taldeak bere bigarren diskoari: Hitzez ulertu ezin dena omendu nahi nuke. Oraintxe! Hitz asko behar izan dituzte giza sentsazioez ari direla esateko, bistakoa, nabarmena ez dena azaldu nahi dutela adierazteko. «Ulertzen errazak diren gauzak egunero ikusten dira, irakurrita, ikusita… baina erraz azaltzen ez diren sentsazioak ez. Horiek islatu nahi ditugu gure diskoan», dio Ibai Gogortzak, taldeko gitarra jotzaileak. Izan ere, hainbat kanturen hitzek ez dituzte gauza zehatzak adierazten, «uneko sentsazioak baizik».

   «Oso-osorik jarraian entzuteko diskoa da hau», Gogortzaren arabera. Zazpi kantuk osatzen dute lan berria, eta diskoa osotasun bat dela garbi utzi nahi du Gogortzak. «Kantu bat bestearekin lotzen dituzten piezak daude». Hori da beharbada alde handiena 2002an kaleratutako taldearen estreinako lehen lanarekin konparatuta. «Orduan ere asko landu genituen kantuak, baina kantu solteak ziren nolabait. Oraingoa biribila dela esango nuke».

   Istorio luzea dauka Hitzez ulertu ezin dena omendu nahi nuke. Oraintxe! lan berriak. «Duela lau urte hasi ginen diskoarekin. Tartean baxu jotzailea ere aldatu genuen, eta poliki egin dugu», azaltzen du gitarra jotzaileak. Baina emaitzak merezi du. «Oso gustura geratu gara». Musika ildo anitz sumatzen dira post-rock alorrean sartu izan duten taldearen disko berrian. «Denetarik entzuten dugu, baita popa ere». Eta ezagun dute euren konposizioek. Lisabö eta Wilco aipatzen du Gogortzak gustuko dituen taldeen artean, «baina horrek ez du esan nahi taldearentzat erreferentzia direnik».

   AUTOEKOIZPENA, «GOGOR SAMARRA». Autoekoitzia da Borrokan taldearen bigarren diskoa, «gogor samarra» gertatu zaien lana. Estreinako Borrokan ere modu horretan kaleratu zuten, «baina laguntza gehiago» izan zuten. Oraingoan gogor aritu behar izan dute, baina ahaleginak merezi izan duela uste du Ibai Gogortzak. «Abestiak grabatu eta azalaren diseinua egin arte lan handia egin behar da, baina emaitza ikustea pozgarria da».

   Taldearen oinarria bateriak, baxuak, gitarrek eta ahotsak osatzen dute, baina disko berrian beste zenbait musika tresna entzun daitezke sotilki. Berako Mik estudioan eta Lizuniagako Aduanan grabatu dute diskoa, 2006ko martxotik 2007ko maiatza arte.

   Hitzez ulertu ezin dena omendu nahi nuke. Oraintxe! plazaratu ondoren, zuzeneko kontzertuak eman nahi diztuzte Borrokan taldeko kideek, eta horretarako bi aukera izango dituzte luze gabe. Datorren urriaren 12an, Donostiako Mogambo aretoan ariko dira, eta urriaren 27an, berriz, Tolosako Bonberenea aretoan. «Horiek dira orain arte erabat lotutakoak, baina leku gehiagotara joatea espero dugu».

   Borrokan taldeko disko berria Arto Artian katalogoan sartu dute, eta haren bidez eskura daiteke. Bestalde, diskoa lortzeko beste bi bide daude: zuzeneko kontzertuak ematen dituzten lekuetan erosi eta taldearekin harremanetan jarri borrokan(abildua)ertza.net helbide elektronikoan.
2. .

   GAZTEZULO Julen Aizpitartek

   Borrokanekoen lan hau askoz pertsonalagoa da; argi dago taldeak bere bideari heldu diola. Bildutako dozena erdi kantak ahalegin horren isla dira. Intentsitatez beteriko uneak gitarra jokoen bidez tenkatu eta bat-batean barealdietan erortzen dira. Zazpi minututik gora irauten duen Izardun irudimenean abestian, adibidez, tarte biziak eta isiluneak bikain uztartu dituzte: doinua bateriaren oinarrizko jo errepikatu batetik abiatzen da, isiltasuna da nagusi, baina ahotsa agertzen denean, gitarrak lozorrotik indartsu esnatzen dira, eta gora eta behera dabiltza kanta hona eta hara eramanez.
   (…)
3. .

   [...] durante estos días nuevos discos, los de Bera su magnífico segundo trabajo autopublicado “Hitzez ulertu ezin dena omendu nahi nuke, Oraintxe!” (disponible vía arto artian) y el combo de Bilbao 3 discos simultáneamente: el recientemente [...]

Powered by Hemingway zaporeko Wordpress.

Entries RSS Comments RSS